傳統名校男拔萃書院尋晚喺會展大禮堂舉行創校一百四十周年晚宴，政壇一眾男拔萃舊生返母校撐場，好似自由黨前主席田北俊同胞弟田北辰、廉政專員湯顯明、教育局副局長陳維安、前行會成員范鴻齡同「新界王」劉皇發獨子劉業強咁，香港青聯主席陳仲尼同太太前歌手區海倫就以學生家長身份捧場。名人舊生同家長畀足面，唔怪得現任校董會主席張宇人（Tommy）話，如果籌唔到五百萬會好失望啦。
田少同陳維安年齡相距幾大，睇佢喺男拔萃邊一年畢業就知，田少六三年，陳維安八二年，可見田少真係駐顏有術。由舊生變身校董會主席嘅Tommy，全晚打住條紅藍斜紋校呔示人，佢話呢條呔由做仔打到做外公，好有感情；如果個外孫都讀到男拔萃，咁就最正嘞！
既然係籌款晚會，自然唔少得拍賣同禮物競投，兩個仔讀緊拔萃小學嘅陳仲尼夫婦，喺眾多競投禮品中，對「任總飯局」嘅十二個名額情有獨鍾，但係投幾多錢好呢？陳仲尼計咗條方程式，以任志剛擔任金融管理局總裁時年薪九百萬元計，除開三百六十五日，再除八小時工作，飯局兩個鐘，大約五千蚊，任總陪食飯，畀雙倍價錢，一萬三千八百八十八蚊，OK啦！