香港男女比例日漸失衡，令社會出現大量「剩男剩女」，同樣雲英未嫁嘅立法會議員陳淑莊（Tanya）早幾日喺網誌中就提議喺facebook成立組群，為未婚男女提供一個邂逅嘅平台，不過加入組群嘅首要條件，係要做過三次或以上伴郎伴娘嘅男士女士。
Tanya忽發奇想，係因為有次同黨友余若薇（Audrey）傾開婚姻時，二人不約而同提起一個都市傳說，就係做過三次伴娘嘅女生會嫁唔出，Audrey仲言之鑿鑿講到呢個「魔咒」男女通用，因為佢當年結婚擔任伴郎嘅朋友，唔知係咪因為做過三次伴郎，所以到依家都未結婚。Tanya即時笑言：「哈！我都做過四次伴娘。」之後佢仲靈機一觸，諗到喺facebook開一個伴郎伴娘小組，用意係撮合做過三次以上伴郎伴娘嘅「孤男」同「寡女」。
Tanya仲教路，好多情侶都由朋友開始，所以男女雙方要抱住一個進取嘅態度，擴闊生活圈子先有望打破「三次不婚」魔咒。唔知Tanya會唔會率先打破魔咒，與愛情長跑七年嘅男友叢鐵飛拉埋天窗呢？