偷嘢如是，掟嘢同樣如是。第一次可能係咁意掟塊蕉皮落街，如果警察叔叔冇繩之於法，下一次咯喎，掟條魚骨囉，再下一次咯喎，掟隻拖鞋囉。

砰嘭！石硤尾白田邨有人掟咗一件可能係香港史上最有殺傷力嘅攻擊性武器落街，一把重達十二磅嘅奪命追魂大鐵錘！沙塵滾滾！磚崩地裂！

根據力學專家估計，假設鐵錘由十六樓掟落街，到達地面嘅撞擊力係三百七十六磅。功夫茶相信，即使橫綱相撲手撞你埋牆，都冇咁勁嘅撞擊力。唔使多講嘞，萬一有人時運低畀佢一嘢扑中，中頭者死，中腳者跛。

邊個ＰＫ咁冷血掟把大鐵錘落街企圖害到途人ＰＫ死呢？警察查唔到，真係唔知道。暫時唯一知道嘅係，擲物狂徒好大可能係同一個ＰＫ，由今年年初一直掟呀掟，係咁掟，不斷掟。最初掟蝦蟹，然後掟硬幣，近來變本加厲愈掟愈瘋狂，刀呀，剪呀，罐頭呀。終於，好似驚你唔死咁，擲物狂徒出動大鐵錘。根據房屋署紀錄，白田邨一年內已有五十幾次高空擲物，數量多到唔掟死都嚇死。

講到呢度，大家估唔估到功夫茶想講乜？冇錯嘞，小時偷針，大時偷金，執法人員長時間捉唔到犯罪分子吖嘛，犯罪分子咪食髓知味囉。兵捉唔到賊吖嘛，賊咪肆無忌憚囉。

咦咦咦，咪住先，係捉唔到吖，定係唔想捉？喂，擲物狂徒長期出現架喇，犯罪模式熟口熟面架喇，只不過一次比一次重手咁解啫，房屋署居然一直冇安裝俗稱天眼嘅閉路電視監察系統，而警方竟然又莫名其妙咁束手無策。假如今次掟把大鐵錘落街都可以逍遙法外，冇人敢保證下次唔會掟支青龍偃月大關刀過你歎。

唉，講開又講，旺角咪又係有擲鏹狂徒嘅，咪又係搞到滿城風雨嘅，警方唔知點解喎，緝兇行動由始至終老鼠拉龜。唔知大家點諗，功夫茶就覺得好唔抵。首先，警方啱啱先至扭計成功，人哋裁員減薪，佢哋逆市加薪，擲物狂徒捉來捉去捉唔到，點同出糧畀佢哋嘅納稅人交代呀？其次，警方啱啱先至有警官集體涉嫌公器私用搭水警輪去蒲台島歎海鮮，飲飽食醉嘞，照道理應該充足電架啦，點解捉賊依然軟弱無力架？

唔好嫌功夫茶長氣，老生常談都要講多次。各位街坊街里，父老叔伯兄弟，出街記住一條社會學金科玉律：行騎樓底戴鋼盔。

你知啦，擲物狂徒禽獸嚟架，冇人性架，好ＰＫ架，而警方又冇辦法除暴安良，咁就要潮州音樂，自己顧自己架喇！