煲呔曾政府日日都有不合乎常理嘅事出現。尋日政府公布再委任錢果豐做港鐵主席，任期至二○一二年尾，由錢果豐○三年出任前地鐵主席起計，前後做足九年半，完全無視同一人「不能擔任同一公職工作超過六年」及「不能同時出任超過六個公職」嘅「六六原則」。
其實錢果豐由○三年七月接任蘇澤光做前地鐵主席，○七年兩鐵合併後再出任港鐵主席至今年十二月，兩次委任加埋已經超過六年，但政府委任錢果豐多三年，雖然可以話兩鐵合併，又重新起錶，但都係茅咗啲，完全當佢自己訂立嘅原則無到。
當初政府訂立「六六原則」嘅原意，係想委任社會人士出任公職時有個妥當嘅安排，唔使搞到成日一人身兼十個八個公職，影響工作表現。但呢個政府一手做出嚟嘅唔跟原則例子好多，○七年委任區議員，就有十五個違反「六六原則」嘅例子，今年七月又無視鄭慕智已經有六項公職，再委任佢做離職公務員就業申請諮詢委員會主席。與其繼續名不副實落去，不如將「六六原則」改名做「六六無窮原則」，等大家鍾意做幾耐就幾耐。