旅遊事務專員方舜文突然跳槽，官場中人感到愕然，旅遊發展局主席田北俊都話事前收唔到風。方舜文尋日主動約田少飲茶，解釋辭職原因，以便日後好相見。
尋晚七點幾，卓妮行經中環一間酒店門外，赫然發現方小姐同田少雙雙步出酒店。千祈咪誤會，佢哋無特殊關係，而係敍舊至真，皆因方小姐遞信嘅消息震驚旅遊界，田少都係睇到報紙先至知道。為免外界有太多揣測，方舜文索性約田少飲茶，直接交代辭職嘅原因。
田少話，雖然自己貴為貿易發展局管理委員會成員之一，但方小姐過檔做副總裁，事前連半點風聲都聽唔到。卓妮問方小姐因乜事走得咁快，佢以笑容作回應，一切盡在不言中。田少聽完「解畫」，一切明白晒。查實方小姐跳槽後人工三級跳，將來大把世界，田少都話唔捨得佢走，祝佢去到貿發局後有更好發展喎。
卓妮