自由黨重兵進駐新區

據悉，自由黨將會派廿幾三十人參選區議員，除競逐連任約廿人，其他主力進攻新區，貪新區之內各個政黨都係由零開始，對地區脈絡薄弱嘅自由黨相對易打，其中又會喺新屋苑最多嘅新區駐重兵。由於區選係二○一二年立法會選舉嘅前哨戰，自由黨影子主席田北辰會視乎各區樁腳實力，決定立法會選區，所以，後年一戰不容有失。

每次區議會或者立法會選舉，兩大陣營都會出現撞區問題，要耗費大量精力排解紛爭，排解唔到，仲會自亂陣腳。我哋尋日同一位自由黨高層傾起呢個問題，佢斬釘截鐵話唔會做損人不利己嘅事，如果研究過勝算唔高，自由黨唔會同民記或者工聯爭位，不過，如果值得一博，唔好意思，自由黨唔會將機會拱手相讓咁話。

呢位高層仲提出一個相當創新嘅建議，就係委託可信機構做選區民調，如果某個選區大家爭持不下，就由民調決勝負，輸者無怨，咁樣建制派就唔使次次都為選舉起晒弶嘞。

自由黨呢個提議，唔知係該黨高層經歷上年立法會選戰受挫後痛定思痛嘅深思熟慮，定係一時即興嘅神來之筆，有民記同工聯核心聽到之後，反應初步正面，都話唔係無得諗。

民記同工聯少有認同自由黨，睇嚟撞區問題，真係困擾咗佢哋好多年。不過，理論同實踐往往係兩回事，民主派以前都試過為區選做民調，由於每個選區隨時得兩、三幢樓，地域咁細，做民調難度極高，就算民調有咗結果，各黨派隨時都會反口，點會以民調結果決定人選咁簡單？所以，就算建制派真係有心做，要搞得成都唔容易。