本文重點
【本報訊】受擲物狂連番突襲的白田邨居民，過去一年惶恐度日，區議員也曾經中招，警方查案闊佬懶理，昨日突然高調做騷，可惜未徹底解除危機。有居民嘲諷：「啲警察都係做戲畀傳媒睇啫！」
前日險死的居民張太指，當時距離墮地的鐵錘僅兩公尺，可謂死過翻生，她踢爆屋邨擲物問題嚴重，幾乎每幢大廈危機四伏，警方一直未有認真跟進。
「有得震冇得瞓」
姓范居民亦稱，上月目睹樓上有人擲菜刀及衣物落街，事後向警方舉報及提供資料，惟警方「懶懶閒」令人失望。范更揶揄說：「警察都係做戲畀傳媒睇啫，如果有心去查，尋日（前日）都嚟咗啦！總之一日未拉到人，都有得震冇得瞓！」
深水埗區議員吳美及甄啟榮均炮轟警方反應遲緩，吳早前曾被水彈擲中，元兇至今未落網。甄又譴責警方前日徒手檢證物，有破壞指紋證據之嫌，反而做騷時認真戴手套，十分諷刺。