畢業後願意長期每年參加母校活動嘅人唔多，尋日拔萃男書院搞籌款賣物會，年年都去捧場嘅立法會飲食界議員張宇人（Tommy）繼續支持母校，不過就自爆讀書時寧願玩田徑同合唱團都唔搞賣物會。不過畢咗業之後，Tommy想為學校做多啲嘢，落手落腳搞之餘，仲花腦汁推高男拔賣物會嘅籌款數字添！
Tommy諗到嘅籌款新招，就係開檔改賣貴價貨。佢話以前賣物會嘅攤檔，唔係玩吓攤位遊戲，就係賣啲由唔同家長捐出嘅小玩意，每樣金額都唔高，雖然聚沙成塔後都有唔錯成績，但籌款數字始終都好難突破。Tommy就諗到賣貴價貨，擴闊「客源」，吸引多啲舊生去買。八○年佢接手做舊生會主席嘅時候，搞咗個專賣高仕金筆嘅檔攤，金筆配上男拔校章，仲可以即場刻埋名，盛惠三百蚊！結果嗰年淨係舊生會籌嘅錢，已經係成個賣物會嘅一半，Tommy果然高招！
另外，尋日男拔校長張灼祥都幫襯買咗唔少嘢，上年喺一百四十幾蚊高位買咗滙豐嘅張校長，曾經呻過滙豐大跌打斷佢嘅退休大計。張校長尋日就話喺適當嘅時候就會選擇退休，唔會畀其他嘢影響到喎！