可惜，聰明反被聰明誤，區區一百蚊小恩小惠嘅慳電膽現金券，被人笑到面黃之餘，仲被人踢爆有利益輸送之嫌，認真難睇，今次政治家真係跳入黃河都洗唔清咯！

煲呔曾施政報告派慳電膽現金券，被指以市民金錢「貼親家」，泛民議員當然起勢狂插，要求佢澄清有冇申報利益，並釐清利益申報涉及嘅親屬範圍。最難堪嘅係，今次連保皇黨都唔敢撐，直斥煲呔曾嘅政治敏感度唔夠，可見今次風波真係可大可小，生人勿近！

相比之下，環境局局長邱騰華政治敏感度比煲呔曾勁得多，佢一睇勢色唔多妥，即刻彈出嚟護主，將成件事攬晒上身，強調政策建議係該局提出，亦要由其他官員決定先至落實。邱騰華以為咁樣就可以同老闆開脫罪名，其實係枉作小人表錯情就真。

喂！呢份叫施政報告呀老友，煲呔曾一人做事一人當，求其搵個做細嘅嚟啃，有冇搞錯呀？呢個鑊唔係邱騰華一人孭得起，況且孭得起亦未必好，孭唔起盞攬住一齊死。難為煲呔曾仲死撐話冇利益衝突，左一句「環保大業」，右一句「公眾利益」，聽到都肉麻。好心啦，搞咗咁多年藍天行動，個天反而愈來愈灰，話唔定有日慳電膽要二十四小時長開添呀。

講真喇，今次事件又難怪惹人質疑喎，請問點解乜都唔派，係都要派慳電膽呀？破壞環境嘅始作俑者係人類，如果要環保，咁派安全套，等地球人口少啲，對環保貢獻咪仲大。

不妨問吓大家，煲呔曾嘅親家係主要嘅慳電膽代理商之一，而煲呔曾嘅施政報告偏偏送慳電膽，你話世事有冇咁蹺吖？台灣嘅陳水扁搞到周身蟻，其實好多弊案都唔係佢經手，而係同佢嘅親家有關。講到呢度，大家應該知道點解施政報告會派慳電膽嘞啩。

話時話，煲呔曾從政咁多年，仲自稱政治家，冇理由連「瓜田李下」都未聽過啩？就算佢係黃皮白心，讀得番書多，唔知乜嘢叫瓜田李下，但點都知道前財政司司長梁錦松因乜事落台啩。不過咁，一樣米養百樣人，世界上有好多種人，有人真傻，有人扮傻，有人真唔知，有人扮唔知，究竟煲呔曾係邊種人，只有佢自己最清楚。

普通人申唔申報利益話之你啦，問題係煲呔曾係香港嘅頭號人物喎，家陣畀人踢爆有「利益輸送」嫌疑，至死死地氣解畫，被問到有冇向行政會議申報，又語焉不詳，支吾以對，好明顯就係心中有鬼啦！

好戲在後頭，以前嘅梁錦松事件又好，依家嘅梁展文事件又好，立法會議員都窮追猛打，咬住唔放，咁就啱喇，喺今次慳電膽事件上，各位議員千祈唔好虎頭蛇尾，不了了之，一定要查到水落石出為止，還市民一個交代呀！