呢嗱，公立醫院又爆斷錯症醜聞。呢次唔止延誤治療，仲令當事人留低心理陰影添。有位區先生個細女詩詩，上兩個月因為嚴重敏感同發熱，被皮膚科診所確診為嚴重濕疹，轉介去廣華醫院跟進，而廣華醫院急症室亦確診係濕疹。

勢估唔到，詩詩入院留醫嗰陣居然撞着個叻唔切嘅病房醫生，係都話佢感染咗水痘，要即時轉院隔離添。嘩！水痘同濕疹完全兩回事，傳染性極高，隨時會死人。但係皮膚科診所同廣華醫院急症室都確診係濕疹，病房醫生一句話就推翻晒，病人同家長信邊個先？

面對家長質疑，院方睬都懶睬，將詩詩同區生夫婦及大仔一家四口，由着晒全副防護裝備嘅醫護人員「押解」住，用白車送咗去瑪嘉烈醫院接受隔離。第二日瑪嘉烈醫院再證實詩詩患嘅確係濕疹，咁至畀佢哋離開。

一家人虛驚一場，被「屈」住咗晚醫院事小，詩詩同哥哥因為呢次恐怖經歷，依家見到醫護人員都驚，咁至大件事。睇病唔成嚇出病，睇怕係香港公立醫院至會發生，難為港府仲好意思話醫療係香港六大優勢產業之一，吹水咩！

兒科醫生話，只要畀啲心機，水痘同濕疹好容易分。再講，詩詩當時發緊燒，好可能感染咗金黃葡萄球菌，延誤治療分分鐘會搞出人命。醫生斷症咁兒戲，隨口噏當秘笈，唔怪得公立醫院事故三日一小鑊，五日一大鑊啦。

講開斷錯症延誤治療，屯門醫院上個月中就爆過一單杰嘢。有個長期便秘嘅小童，輪咗七個月終於睇到專科。醫生除咗照下Ｘ光，問都唔問，次次覆診例牌處方甘油同埋纖維粉就算，個病始終醫唔好。家人愈諗愈唔對路，帶個仔去私家醫院檢查，發現原來係可以致命嘅巨結腸病，好彩及時開刀救番條命。

病人入到醫院，醫生做嘅第一件事就係斷症，正所謂「對症下藥」，連乜病都搞唔清楚就話做呢樣搞嗰樣，你話打錯針、開錯藥、調錯嬰、插錯喉、割錯器官，有乜辦法唔一劑接一劑吖？

廣華醫院回應話，詩詩嘅診斷結果係嚴重濕疹，但「懷疑」同時感染水痘；而瑪嘉烈醫院又唔認病人因水痘轉院。你推我卸，即係點吖？如果未確診就將個細路女掟嚟掟去，試問公立醫院到底係睇病定靠害㗎？

冇計啦，食衞局局長周一嶽轄下嘅醫管局，大部分資源去晒管理層薪酬開支度，前線服務資源不足，醫護人員做到嘔。計功夫茶話齋，公立醫院衰完一單又一單，一啲免疫力都冇，分唔出水痘同濕疹，有乜出奇吖，睇怕患咗冇得救嘅絕症就真！