14/10/2009

播放本新聞相關短片

政情:白姐姐爆粗寸甘威?

向來處理男女情事有一手嘅白姐姐,尋日出席網上電視台嘅訪問,大講甘威有好感事件,主持之一嘅林子健,雖然身為民主黨黨友,亦一樣毫不客氣,三人說到興起處,向來率性嘅白姐姐還疑似爆粗,甚至疑似性騷擾兩位男主持,難得二人都不介意,還相當受落。

白姐姐輕輕鬆鬆就把謝偉俊嘅「青島張茆」搞掂,早前接受本報訪問時又向甘威獻計,尋日佢喺節目又向甘威掟橋,仲提咗兩個方案畀甘威參考。白姐姐話,甘威在事件上處理不當,事關鬧大並非因為示愛,而是有冇講大話、有冇利用職權以及不尊重人權;佢話作為政客做錯不重要,重要係人民信你說甚麼。此時主持都附和話:「死梗!」言下之意話得不到人民信任就死梗。點知白姐姐隨即不經意地加咗一句疑似「是×但」,即係「是但」喇,佢講得好順口,聽上去似係講緊粗口,可能係因為佢講嘢嗰陣同主持嘅聲音略有重疊先出現錯覺。

說話一向不忌諱嘅白姐姐又話,男女雙方要搭上,只係單方面付出好難成事;仲話現今男士講求「水嘴諗噱嘜舌×(略去)」七個字,每個字後面都要加個頭;佢愈講愈過火,話嘴頭與舌頭係不同的……唔知兩位男主持有冇覺得被性騷擾呢?