何解？原來，嗰度根本好似無掩雞籠咁，如果賊人有心作案，只要吼準時間，直頭可以長驅直入，連放有夾萬嘅局長辦公室亦唔例外。有員工擔心終有一日呢啲明顯嘅保安漏洞畀人睇穿，再爆郵局劫案，威脅到佢哋嘅人身安全。

講真，郵局就好似間小型銀行，一樣係咁多水。政府同公共機構嘅繳費、賣郵票嘅錢，仲有等同現金嘅一疊疊郵票，全部喺晒度。之但係，本報記者發現，加連威老道郵局嘅保安程序根本形同虛設，漏洞隨處可見。

最離譜就係，按照正確程序，郵局開工前大門要保持關閉，職員返工要由入面嘅同事開門。但有人為求方便，懶理程序，求其喺銀包攞張提款卡出嚟，插入門隙再刷一刷，道門就會打開，成個過程三秒鐘都唔使就搞掂。

同樣兒戲嘅係，郵局入面要用鎖匙出入嘅「職員專用」通道，基本上冇人會用，包括局長在內嘅大多數員工，都通過為方便大型包裹過磅、只有半截活門嘅工作櫃位出入。由大門到職員工作區可以掂行掂過，就差掛埋塊「歡迎賊佬光顧」嘅招牌啫。

為咗自己方便，明明有保安程序都唔遵守，如果畀賊人留意到呢啲明顯漏洞，利用每日郵局關門後至解款車到達前嘅「黃金半小時」埋手，簡直如入無人之境，三幾分鐘乜都搞掂啦。咁搞法，咪等於間接同不法之徒「裏應外合」？

至弊就係，忽視郵局保安造成財物損失，早有前車之鑑。過去三年，本港年年都有郵局劫案發生，被搶走嘅錢由幾千蚊到幾萬蚊不等。○六年，警方經過巡視同研究後，指出全港郵局存在保安員年紀大、職員少、開放櫃位設計同埋郵局位置四通八達共四大安全漏洞。

但郵政部門根本冇吸取教訓，其後雖然因應警方建議，喺櫃位設施等方面做咗部分改善，但管理層監管失職，員工連出入要用鎖匙呢啲最基本嘅保安程序都當冇到，硬件再好都冇用，咪盞嘥公帑。亡羊唔去補牢，遲早乜都冇清光。

話時話，郵局中門大開不設防，入面又放咗咁多現金同郵票，同一部等住賊佬嚟幫襯嘅「提款機」有乜區別？三年前聖誕前夕，有獨行賊喺港島鴨脷洲利東邨郵局趁午飯時得局長一個人值班，利用郵局保安漏洞潛入，用刀挾持局長打開夾萬，劫走七萬蚊。

計功夫茶話齋，聖誕又快到，郵局保安漏洞根本冇改善，不法之徒照辦煮碗，隨時嚟「提款」，過番個快樂聖誕，咁就認真大鑊咯。