中環立法會大樓外面嘅停車場有幾大，一眼睇晒，橫擺掂擺都只放到二十零架車，但議員就有成六十位，再加埋秘書處職員，一遇上立法會開大會，九成九都會逼到爆晒倉。就算喺冇會開嘅日子，亦有唔少議員為咗貪方便或者慳番啲泊車錢，將自己架車泊喺立法會過夜，或者出開中環時借嚟暫時擺住先。

為免停車場經常爆滿同維持公平原則，秘書處一向都嚴禁議員喺任何時間內泊多過一架車喺停車場，不過有關規定並無任何罰則，不時都有議員違規。揸兩部車去立法會，有議員係偷雞，亦有情急下將車泊完一架又一架。今年四月，當時被「青島張茆」緋聞纏身嘅旅遊界立法會議員謝偉俊，為咗趕住同白姐姐外遊箍煲，將兩架靚車泊咗喺立法會停車場成個星期，最後畀秘書處發信警告佢。