本文重點
財爺鬍鬚曾在毫無先兆下心臟病發入院，令外界以為政界人士掛住工作忽略個人健康，但原來多位高官、行會成員及立法會議員，個個都有定期做身體檢查，有議員仲密到三個月檢查一次，平時均衡飲食再配合適量運動，唔使搞到通波仔咁難搞。
尋日行會開會，發展局局長林鄭月娥、行會召集人梁振英（CY）、成員夏佳理（Ron）、李業廣（Charles）及查史美倫，個個都話年年有驗身。患過心臟病嘅Charles話，每次驗身乜都驗齊晒，保證穩陣，平時就喜愛出海潛水當做運動。娥姐話政府每年提供一次免費驗身，但佢以私隱為由唔肯講做乜嘢運動喎。
一直保持中等身材嘅CY就話，佢每日都有運動，在家中經常游水及耕種，好似上周日花咗半天播種，運動量十足。多年前接受過「通波仔」手術嘅阿Ron就教路，心臟出過問題，食嘢要盡量戒口，高脂肪及高膽固醇嘅食品就唔好食嘞！
象哥心跳異常緩慢
講開心臟出問題，噸位十足嘅立法會議員黃定光（象哥）十年前驗出心臟跳得異常緩慢，但象哥自覺身體唔係咁差，做跑步機檢查時仲Fit過正常人，醫生都難以置信。象哥仲講笑話：「我唔怕心臟病，只驚荷包肝硬化，即係冇水。」
眾多政界人士之中，以肥嘟嘟嘅專業聯盟石禮謙最錫身，他自嘲太肥屬高危人士，事關佢經常美食不離口，雖然未患高血壓，但肥肚腩就現晒形，所以都要警惕吓自己，盡量食少啲油膩嘢；為穩陣計，佢每三個月檢查身體一次。