熟悉港府內部運作嘅人都知道，港府名義上嘅最高決策機關行政會議，可以話只係一個橡皮圖章，真正掌控政策優先次序同內部資源分配嘅，其實係由政務司司長主持嘅「政策委員會」同「星級委員會」，各政策局及部門計劃推出乜嘢新政策同法案，爭奪有限的新資源，全部要經過呢兩個委員會協商批准，先可以提上行會同立法會。

呢個制度除咗有助理順政府內部嘅資源分配同施政緩急先後之外，某程度上亦係對特首嘅一種制衡，避免佢為個人民望同喜好亂花錢，或者強行推出一啲不切實際嘅政策。不過煲呔曾最近一改過往十多年嘅做法，取代唐唐做咗「星級委員會」嘅主持。

破壞多年制度

據聞煲呔曾作出有關變動，表面上係好重視即將公布嘅施政報告提出嘅政策，唔希望得唔到「星級委員會」全力配合而冇錢推行，佢有見於自己任期剩番兩年多，如果唔親自抓緊政府嘅內部資源分配，好難喺佢下台之前可以落實其六大產業大計。不過政府內部就有人質疑佢呢個攬權做法，認為不但破壞咗多年來行之有效嘅制度，亦令人覺得煲呔曾其實係信唔過其他人。

有官員更加批評，煲呔曾當年做財政司司長時，公開講過最憎人哋對佢草擬預算案嘅工作指指點點，佢做政務司司長時，亦試過畀老董放逐咗去做清潔大隊長，依家竟然又自打嘴巴行番老董當年嗰套，再次證明權力真係會令人腐化。