邱詠賢想「複製」楊沛宜

今次活動有份為英國劍橋大學籌款，張太尋日安排咗劍橋大學魯賓遜學院合唱團同京奧開幕禮上幕後代唱嘅楊沛宜預演，第一次聽劍橋合唱團嘅李家誠聽到如癡如醉，但去年舉行婚禮嘅邱詠賢就畀楊沛宜吸引住，仲講笑話想生個好似佢咁靚又咁叻嘅女喎！

不過講到玩音樂，依家做生意愈來愈叻嘅家誠就耍晒手，佢同卓妮話自己拍子感差，唱歌樂器無樣識，但囡囡晞彤就唔同，拍子感好好，一聽到音樂就識跟住打拍子，仲識得跟住廣告歌哼添，囡囡咁得意，難怪佢一講起囡囡就四萬咁口啦。以前晞彤喺媽咪肚入面聽古典音樂做胎教，依家家誠Keep住畀佢聽音樂，等佢瞓得好，又可以斯文啲。家誠仲話會畀個女學樂器，等佢多方面發展。

張嘉慶幫何超雲突圍

同樣獲賭王同三太細心栽培嘅超雲，細個因為功課忙，所以鋼琴考到三級就無再學落去。講開又講，賭王尋日盛傳會轉院休養，超雲一到場就畀傳媒問到失晒魂，好彩有幫手做司儀嘅張太大仔張嘉慶英雄救美，佢同媽咪一齊帶超雲衝出重圍，卓妮見到都覺得嘉慶好Man。

講開嘉慶，佢今年升劍橋法律系三年級，之前香港律師會會長王桂壎炮轟法援請律師時薪衰過水喉匠，嘉慶話唔擔心出路，依家最緊要讀好啲書先。另外今次個活動將會印成光碟派畀香港同海外嘅學校同圖書館，所以畀香港旅遊協會評為本年度最精彩盛事之一，張太話旅發局主席到時嚟唔到，但會捐錢支持，好有心。

卓妮