劉健儀唔敢性感

尋日係中國廿四節氣嘅「秋分」，果然秋風送爽，但Audrey一大清早出席立法會交通事務委員會會議，只係着咗件小背心及花裙，再加件有喱士邊嘅薄紗面衫。立法會冷氣咁凍，卓妮都驚佢冷親，究竟係咪抵冷貪瀟湘就唔知嘞，但就引來四方八面嘅目光打量，就連衣着包到冚嘅自由黨主席劉健儀（Miriam），都忍唔住走埋Audrey身邊，歎住茶傾番兩句。

Miriam話，第一次見Audrey咁高「透明度」，仲大讚Audrey有條件着到咁性感，佢自己就唔敢着得咁性感嘞！Audrey就話件薄紗面衫已經着過幾次，亦唔係要出席乜嘢特別場合喎。

Audrey向來着衫有道，將衣飾拼湊出個人獨特風格，絕不盲目追求名牌，早排仲批評時下G模賣弄性感多過做模特兒，睇怕佢嘅衣着尺度都唔會好過火。

卓妮