政情：曾蔭培做一哥 賴死唔走
最近坊間茶餘飯後都討論緊講述警隊高層權鬥嘅港產電影，有指戲中「做數好叻」嘅郭富城，就係當年嘅警務處副處長（管理）曾蔭培（YP）。不過，故事尚未完結，有傳○三年底YP離任警務處處長前不足一年，曾去信時任保安局局長，賴死要求再坐一會留多兩年，但礙於警隊內部有好多人等住升職，搞到保安局要將封信轉交時任嘅政務司司長、即YP嘅大佬「貪曾」曾蔭權，但大佬最後都幫唔到手，認真耐人尋味。
話說○三年YP踏入退休年齡之際，外界一致睇好由李明逵（Dick Sir）接任一哥，但當時就有消息傳出YP企圖再坐一會。就喺同一時間，再有聽風者話，熱門接任人Dick Sir會過檔做懲教署署長，令YP再坐一會嘅傳言疑幻疑真。雖則當時Dick Sir多次否認過檔，但風聲未有止息，最後搞到Dick Sir使出一句：「生係香港警察人，死係香港警察鬼」，表明心志先至成功坐上一哥之位。
至於當時Dick Sir過檔懲教署嘅風聲，唔通都係YP延任行動計劃之一？呢個真係要問番放風人先至知喇。不過，結果YP如期退任，有講法話係有人唔想曾氏兄弟同掌文、武大權，否則後果不堪設想。
退休一周申轉職惹批評
YP任內經常盛讚自己嘅管理能力，連番吹噓自己係CEO（行政總裁）人才都唔會臉紅，所以佢離開警隊轉投商界亦不足為奇。不過，一般高官退休後，除非得到批准，否則要過冷河兩年先可以加入私人機構，但○三年底YP退休後一星期，旋即傳出佢已向政府申請轉職嘅消息，效率之快實在令人咋舌，亦惹起不少輿論批評。結果YP喺○四年六月出任新創建執行董事，再次激起社會批評，但當時公務員事務局強調YP轉職依足規定喎。
不過，社會大眾嘅眼睛係雪亮嘅，貪曾○五年做特首時，就被人問起佢當年係咪有親自處理細佬YP嘅轉職個案，但貪曾斷言否認，竟然話唔知自己嘅細佬妹做緊啲咩喎，真係講都冇人信，足以反映貪曾做事唔清唔楚、貪盡海陸空都當冇事嘅性格。