正常而言，輪胎點先至可以做到節能效果？先決條件當然係設計一流，質料上乘。之不過咁，唔少香港人出晒名蠱蠱惑惑，未必想正正經經節能，只係想旁門左道慳錢。譬如話，佢哋會為咗慳幾百蚊而選購舊料翻新嘅車胎，結果呢，隨時車毀人亡。

前日喎，青葵公路往青衣方向發生奪命車禍，一架貨櫃車爆胎失控，由慢線剷咗去快線撞壆停低。十分鐘之後，一架的士撞向貨櫃車，的士司機當場死亡，三名乘客浴血受傷。

根據初步迹象顯示，的士司機有可能係因為切線爬頭視線受阻，冇發覺快線停咗一架壞車，所以一頭撞過去。之不過咁，貨櫃車都有問題，警方表示，貨櫃車前右胎爆開，露出鋼線塑膠，懷疑係俗稱嘅「翻倒胎」。

翻倒胎係乜傢伙？即係咁，透過高溫及冷凍技術，將已經磨蝕到光頭嘅舊車胎補上一層有坑紋嘅新膠，情況就好似你攞對磨到蝕晒嘅舊鞋去補踭。翻倒胎好處係夠平，價錢比新胎低約五成；缺點係危險，過度受壓或者碰到尖硬物體容易爆胎，亦有可能外殼甩脫。

你知啦，普通私家車就話四個轆啫，貨櫃車有十幾個轆，轆轆都係錢，以每條新車胎一千蚊計算，換晒成套要萬幾銀。假如用嘅係翻倒胎，年中慳番唔少。於是乎咯喎，唔少貨櫃車司機寧願犧牲安全，頂硬上採用翻倒胎。

好嘞，講到呢度，你估運輸署知唔知道問題所在吖嗱？梗係冇可能唔知啦，你估佢哋真係蠢過隻豬咩。事實上香港周不時都會發生翻倒胎導致嘅交通意外。好似話○八年一月，屯門有一架二十四噸貨車爆胎，噴出嘅氣流強到將隔籬一架客貨車玻璃擊碎，車內一個女嬰幾乎冇命，肇事貨車就係懷疑用咗翻倒胎。

既然運輸署冇可能唔知道翻倒胎嘅潛在危險，點解又容許呢種計時炸彈繼續穿梭往來大街小巷呢？點解唔立例規管呢？點解唔訂明嚴格準則，要求翻倒胎必須通過測試先至可以發售同埋使用呢？功夫茶諗來諗去，只諗到一個字：懶！

可能有人會話，喂，咪住先，舊胎翻新幾好噃，循環再造夠環保吖嘛。冇錯，環保係好，之但係如果舊胎補完又補，又或者手工唔好，翻倒胎爆完又爆，害死人邊個賠呀？如果你搬出環保大道理，運輸署更加有責任監管，甚至有義務同環保署攜手合作，釐定既安全又環保嘅政策，規定翻倒胎嘅使用準則。

點都好啦，咁啱今日係「無車日」，答應環保組織行路返工嘅高官，不如乘機諗諗計仔將翻倒胎變成安全嘅環保好輪胎，唔好白白浪費「無輪用」嘅良辰吉日吖嘛！