全國人大常委范徐麗泰去年卸任立法會主席後，生活優哉游哉，好得閒就唔講得，但起碼去多咗旅行。范太去年九月牛一，就同姑仔范尚霞坐郵輪暢遊墨西哥九日，其後再去韓國首爾旅行，到咗今年六十四歲牛一，范太又同姑仔、女兒范凌華及女婿Alex一齊飛去日本北海道慶祝生日，浸溫泉兼品嘗心愛嘅鮮海膽，人生如此，夫復何求。
范太尋日搭下午三點機先飛到東京，明日再轉JR到札幌，過程相當轉折，為乜范太有直航機唔搭呢？凌華就爆料，話范太想搭日本豪華列車好耐，所以特別安排呢個行程。其實搭火車嘅好處係可以欣賞沿途優美風景，加上豪華列車設備齊全，仲有懷石料理和法國菜供應，但價錢就好乸脷。不過唔緊要，事關今次旅費由女兒及女婿全包，當係送畀范太嘅生日禮物。今日係范太嘅生日正日。
范太話，自己好鍾意到風景靚嘅地方，多年前曾經去過北海道，今次再去希望到富良野睇吓薰衣草園，住吓溫泉酒店，歎吓美味嘅海膽。在啟程之前，范太話好多朋友問佢攞份行程參考吓，原來佢啲朋友都想去日本自由行，但擔心唔識聽唔識講喎！