吓？咁好世界？唔通真係天有眼，窮等人家可脫貧？喂喂喂，咪住先，大家千祈唔好受到誤導，因為所謂「好轉」同埋「改善」，只不過係相對概念，好多時候冇乜意義。打個譬喻，假設你係搵個仙刮痧都冇嘅窮光蛋，忽然之間多咗一蚊雞，你嘅情況冇錯係「好轉」，你嘅收入的確係「改善」，但係對於你嘅實際生活有冇啲啲咁多多幫助呢？梗係冇啦。

好嘞，大家睇睇勞福局嘅貧窮指標，其中一項係話，○八年每月就業收入中位數係一萬一千蚊，屬於「改善」，不過實際上只係比○七年多咗五百蚊咁大把，你話有冇用呢？

所以話啫，根本冇必要理會「改善」或者「好轉」嘅相對概念，否則好容易畀政府搵老襯，淨係睇絕對數字就夠。二十四項指標之中，最得人驚嘅係呢一項：超過十九萬戶家庭，入息低於每月三千七百蚊平均綜援金額，佔全港家庭總戶數嘅百分之九點六！

大佬，有入息即係有工作啦，而辛辛苦苦賺番嚟嘅錢居然少過綜援，你都咪話唔悲哀。唔好唔記得，三千七百蚊唔係個人收入，而係家庭入息，平均每日只有約莫一百蚊養活一家幾口，生活艱難到冇朋友！

講到呢度，功夫茶忍唔住又要引述財爺曾俊華嘅豪言壯語，佢話喎，經濟最壞情況已經過去，隧道盡頭見到曙光。功夫茶想問一句，財爺呀財爺，香港百萬窮人何年何月先至可以見到曙光呢？

唉，由董建華年代開始，特區政府一次又一次話要消滅貧窮，點知一次又一次空口講白話。大家都記得啦，政府最初高調成立扶貧委員會，由當時嘅財政司司長唐英年親自掛帥，左搞搞右搞搞，上騰騰下騰騰，始終都係煲冇米粥，結果乜都冇，仲要執埋笠。雖然話每年更新二十四項貧窮指標啫，不過數據係嚴重滯後嘅，家陣○九年都過咗一大半嘞，勞福局講嘅仲係○八年數據，完全未反映金融海嘯嘅殺傷力。

計功夫茶話齋，最近咪有電視節目《窮富翁大作戰》嘅，邀請幾個有錢人紆尊降貴體驗貧窮生活，有人住板間房，有人做清潔工，不如咁嘞，開拍續集，由曾俊華擔綱演出流浪漢，晚晚瞓街！

不過，怕且鬍鬚曾唔肯瞓街，如果高官識得「民心我心」，滅貧政策早就唔會吹牛啦！