由於「五散人」自己都唔認係政團，煲呔曾早前就施政報告諮詢各立法會黨派，就將佢哋撥咗入獨立議員嘅組別，令部分「散人」相當不滿，威脅如果煲呔曾唔肯獨立見佢哋，就會集體杯葛會面。言猶在耳，「怪醫」梁家騮就混埋其他幾名獨立議員，一齊上咗政府總部同煲呔曾開會。

怪醫其後解釋，佢喺其餘四人作出有關決定前，已經答應咗出席會面，加上佢有啲業界好關注嘅問題想同煲呔曾講，於是就費事臨時爽約喇，唔係有意摑其餘四人一巴。但究竟呢次係咪單一嘅獨立事件呢？

各持己見唔協調

我哋日前同怪醫傾過「五散人」加強合作問題，發現佢嘅睇法同其餘四人好唔同。第一係佢認為「五散人」為免工作重疊，建議重組喺各個委員會嘅分工，其實係搵自己笨。佢認為如果五人真係特別關注某個議題，就更加應該冧多啲友入去相關嘅事務委員會，而唔係每個委員會都只派一兩個人，分散自己嘅實力。佢又埋怨自己喺衞生事務委員會，成日都要以一敵眾，反而啲泛民主派仲不時會撐吓佢，暗批其餘四人冇盡力幫自己。

談及其他「散人」希望加強關注弱勢社群，怪醫就更加火滾，重提佢去年提出嘅回購領匯動議，並非單單想幫啲公屋商場醫生，最受惠嘅係公屋居民，但其餘四名「散人」當中，只有資訊科技界譚偉豪抵得住政府壓力撐佢，令動議唔夠票唔能夠通過分組點票。依家政界要求政府回購領匯嘅聲音愈嚟愈大，但領匯股價已由去年嘅十三蚊，升到依家嘅十七蚊，錯失咗回購嘅最佳時機。

對於改名問題，怪醫就力撐「五散人」呢個名其實相當唔差，充分反映到佢哋嘅運作同特質，又強調五人當初走埋一齊，已經講明唔會綑綁投票及放棄獨立身份，睇唔到點解要改變初衷。睇嚟「五散人」想政團化，傾掂數先喇！