迪士尼兒童基金尋日宣布資助九個慈善團體搞親子活動，仲搵咗負責評審申請嘅行政會議成員鄭耀棠（棠哥）嚟做嘉賓。宣布完入選名單後，大會就安排咗上屆其中一項獲選計劃成員出嚟表演。本身諗住身為評審嘅棠哥會坐喺台下細心欣賞，點知佢就落場玩埋一份。
個表演係五個人一字排開，每人手執一支長竹，用支竹轉住隻碟，然後交畀隔籬嗰個，呢門雜技睇嚟好似好容易，但少啲默契都可能會整跌隻碟，一啲都唔簡單。不過呢種把戲似乎難唔到棠哥，佢每次交碟都聚精會神望實個支點位，話咁快就傳咗五隻碟。最後司儀宣布表演完畢，棠哥玩到停唔到手，決定向高難度挑戰，由手執長竹改為以手指頂住支竹嚟轉碟。雖然差啲失手，但最後都眼明手快撈得番，結束一分鐘嘅表演。
棠哥轉得頭頭是道，唔通私下練兵？一問至知棠哥只係喺表演前試玩咗半分鐘，仲話就係咁發掘咗自己嘅藝術天賦，如果有個經理人幫佢，可以考慮吓搞show添！咁都好，以後要表演，佢除咗唱首本名曲《把根留住》，仲可以把碟轉幾轉。