14/09/2009

播放本新聞相關短片

男色誘惑:眉濃鼻挺必遲婚

最近娛樂圈唔係天王結婚,就係女星傳出喜訊,搞到唔少已到適婚年紀嘅囡囡都心思思,希望快啲拉埋天窗,但可惜身邊唔好話結婚對象,連男性朋友都唔多個,唔通要等多十零年至結到婚?今日搵嚟玄學家梁瑋鈞師傅,為大家指出遲婚囡囡嘅面相,大家一定要留意呀!

眉濃難覓愛

據梁師傅講,古時適婚嘅年紀係二八年華開始,二八即係十六歲,如果到咗三八年華,就已經畀人叫做摽梅已過,嫁杏無期。但到咗今時今日,隨着社會進步,被指為遲婚者,一般都係指過咗三十歲嘅人。

而喺面相學嚟講,除咗古時一套之外,仲要加入新元素,今日梁師傅就會同大家逐一分析吓。首先從眼眉講起,眼眉主要講精神思想,囡囡切忌眉毛太濃密,因為佢哋會以事業為重,寧捨愛情,以便發展事業。

另外八字眉亦唔係咁好,因為思想比較悲觀,而且疑心較重,小小事都會唔開心,很難維繫感情,除咗眼眉之外,眼睛又大又圓嘅女仔,亦要小心,佢哋感情十分豐富,但凡事三分鐘熱度,所以極難找到真愛。

鼻挺太強悍

由於眉眼主三十一至四十歲嘅運程,之後要留意鼻樑,原來鼻樑太挺都係唔好,鼻樑挺直,表示個性強悍,意志堅定,敢愛敢恨,愛情離聚都喜歡採取主動,控制一切。

由於個性問題,不太適合早婚,要四十五歲後性格才會改善,到時有機會遇上佳偶,另外亦要留意人中,有囡囡人中兩紋好明顯,咁表示性生活正常,但如果人中兩紋唔明顯,咁即係表示性生活出現問題同偏差。

但人中兩紋不明顯,原來係可以改嘅,只要婚後,就會慢慢改變,所以不用太擔心。而再往下睇落去,女士們要留意自己嘅嘴唇,如果太薄,代表夫運不佳,因為嘴唇太薄代表無慾無求,一心只為理想打拚。

養埋老公

所以嘴唇薄嘅囡囡不容易找到結婚對象,特別是年輕時雄心萬丈,更唔會為愛情放棄理想,要囡囡事業有成,一般大約四十歲過後,才會開始尋找另一半,再拍一兩年拖,最快都要四十五歲左右至有結婚嘅機會。而再睇落去,就要留意自己嘅下巴,好多囡囡都以為下巴尖尖會好靚,但原來下巴尖尖缺乏耐性,工作喜歡走嚟走去,而且家庭觀念唔係太強,揚言最怕照顧小朋友,當中年發福,下巴變圓時,態度才會改變。

最後睇埋兩面腮骨,如果腮骨位左右凸出,表示十分捱得,一輩子要靠自己養活自己,唔係享夫福嘅命,勉強成婚,丈夫會不務正業,要靠你供養過活,要到中年過後,長出肉包裹後運程才會改變,等多幾年吖。

撰文:阿豪

鳴謝:玄學家梁瑋鈞師傅