新界居民成日鬧政府政策僵化，令新界農地荒廢，變晒垃圾崗，但政府一直懶理，鄉議局求人不如求己，自己搵浸會大學當代中國研究所聯手做研究，將新界配合珠三角發展，搞活新界土地，尋日同研究所舉行簽約儀式。咁大個Project，除咗有「新界王」、鄉議局主席劉皇發出嚟主持大局，其公子劉業強（Kenneth）亦有到場跟爸爸學嘢。
Kenneth最近頻頻曝光，最新搞作係擔大旗搞屯門「十‧一」活動。我哋尋日問發叔係咪想培養Kenneth做接班人，發叔話，Kenneth都四十歲仔，係時候出嚟服務基層啦，依家當喺鄉議局實習囉。至於Kenneth嘅表現到底值幾多分呢？發叔唔肯直接畀分，只係話：「中規中矩啦！」
發叔喺政界素有江湖地位，Kenneth如果從政，夠晒先天優勢，不過發叔似語帶玄機咁話，從政好講興趣，Kenneth對從政嘅興趣只屬一般，佢仲頗有感慨咁拋低一句：「望子成龍，人人都有咁嘅心態，問題係有時期望同現實會有差距，睇佢自己嘅造化啦！」睇嚟Kenneth會唔會從政，都有排諗囉。