立法會議員「大舊」陳偉業早前去咗加拿大出席囡囡嘅婚禮，之後去咗一個商場行街，離遠望到個熟口熟面嘅人影，原來係咁啱又去咗當地度假嘅政制及內地事務局常秘羅智光同佢太太，於是佢就一個箭步衝上去，再用佢一貫嘅超高聲量大嗌五區總辭，爭取普選嘅口號。
羅智光同太太行行吓街，突然見到一個牛高馬大嘅光頭佬衝埋嚟大叫，自然畀對方嚇窒咗，以為畀人點錯相尋仇。羅智光呆咗幾秒鐘之後，先至回過神來識得回應，話知道大舊好着緊普選問題，但吊頸都要唞吓氣㗎，使唔使追到嚟加拿大呀？
大舊瞓晒身爭取普選，但對爭取抱孫就唔係好積極。佢話囡囡今年只得廿四歲，唔使咁快放棄二人世界，最好就等到佢退休先至生，咁佢就可以專心幫手湊孫，唔會錯過未來孫仔或者孫女嘅任何美好成長片段。