香港無錫幫尋日喺酒店搞咗個「香港無錫商會第二屆會董就職典禮暨無錫——香港現代服務業合作懇談會」，除咗榮譽會長唐爸爸唐翔千外，佢家族上上下下都有出席。身為政務司司長唐唐細佬嘅唐慶年（Tom）對哥哥是否選特首，佢嘅答案係驚「畀人鬧」又怕「有人嬲」，所以唔肯講。不過更搞笑嘅係唐慶年講嘅港式「煲冬瓜」，連唐媽媽都笑佢同講無錫話嘅唐爸爸雞同鴨講。
同爸爸雞同鴨講
尋日場面咁熱鬧，卓妮都貢咗去睇吓。唐唐最細嘅細佬唐慶年係今屆無錫商會嘅常務副會長，尋日都有現身，卓妮問佢撐唔撐大佬選特首？佢就話對哥哥有信心。至於大佬私底下有無同佢講要選特首，Tom就故作神秘咁話：「我唔講得，會畀人鬧！」卓妮再問佢另一疑似候選人梁振英都好似有意參選，係咪同佢阿哥爭？佢又鬼馬咁話：「我點可以咁講，會有人嬲！」究竟Tom係怕唐唐鬧佢、驚壞咗哥哥大事，定係驚梁振英鬧佢呢？總之佢欲言又止。
之後Tom上台同鄉親們致辭，佢啲「煲冬瓜」相當「爛」，不過台下嘅唐媽媽完全唔意外，事關佢哋屋企每日開雙語廣播，淨係講無錫話嘅唐爸爸同來自蘇州嘅唐媽媽用上海話交談，但唐媽媽同仔女就用廣東話，所以啲小朋友唔係好識無錫話同普通話，難怪唐媽媽笑佢哋兩仔爺鬧意見都係雞同鴨講。
同樣係無錫人嘅趙世光同哥哥趙世曾都有嚟，睇好無錫前景嘅趙世光話會考慮加重喺無錫嘅投資，佢嘅大女式明就話自己成日返無錫巡視物業，問佢係咪開始接手爸爸嘅生意，佢就以笑嚟回應。至於搞地產嘅趙世曾就話個巿開始好，仲話最緊要人人有工開，自己唔會炒人。
田少半個無錫人
另外，唐氏家族「年」字輩最細嘅唐耀年都有嚟，佢依家幫四叔李兆基做投資經理，佢話四叔好睇得開，股巿上落都唔會愁眉苦臉，仲話去年年尾收到嘅花紅拍得住投資銀行。
自由黨前主席田北俊就以旅發局主席身份出席洽談會，佢話媽媽係無錫人，所以自己都算係半個無錫人，原來香港無錫幫都唔嘢小噃。
卓妮