校園驗毒試驗計劃政府志在必行，但坊間嘅爭議聲音依然此起彼落。已為人父嘅入境事務處處長白韞六當然舉腳支持。佢話其實驗毒就好似安檢咁，如果無嘢嘅，又何須怕畀人驗呢？
白韞六尋日一身便裝出席一個開幕禮，啱啱喺月初放完假嘅佢，同屋企人去咗旅行散心，唔講唔知，白家有子初長成，佢囝囝已經廿幾歲人啦。講起囝囝，白韞六嘴角泛起一絲笑意，原來佢囝囝已經出身，做緊會計，仲每個月都好似有畀家用；雖然係畀太太，但難得囝囝事業有成，佢梗係好開心啦！
白韞六話，回想囝囝細個嘅時候，佢同太太一個做好人、一個做醜人，無非想教好個仔；咪睇白韞六斯斯文文就係做好人，原來佢以前為咗教仔會略施體罰，所以其實係做醜人嗰個。對於依家青少年又濫藥、又掛住上網打機，佢就話託賴囝囝細個無呢啲問題，但假如有需要，佢都贊成畀囝囝去驗毒，事關佢覺得驗毒同安檢一樣，好似進入接力跑開幕禮會場咁，都要經安檢啦；只要係無嘢嘅，又使乜怕畀人驗？聽落都幾有道理喎！