一年一度嘅大型籌款活動毅行者十一月舉行，今年主題係「為貧窮人對抗氣候變化」，樂施會尋日開記招簡介活動，吸引數百位參加者到場聽行山秘笈，當中除咗一眾爬山一族外，仲有一個新面孔，就係人稱「魔童」嘅城市電訊（香港）主席王維基，佢話自己係首次參加毅行者，所以目標唔係訂得好高，只係希望可以完成賽事。
王維基自嘲話，佢以前係孱仔一名，好少做運動，但近年開始接觸長跑，每逢唔使公幹留港嘅日子，都會日日練跑至少十公里，去年佢挑戰全馬（馬拉松），好可惜跑唔足全程。今年王維基再接再厲首次參加毅行者，仲特意向行過毅行者嘅老友運輸及房屋局副局長邱誠武取經，王維基話：「佢（邱誠武）都行到，我冇理由唔得㗎！」
講到籌款，王維基好有信心，希望突破大會訂下嘅五十萬元紀錄：「目標係可以破到大會紀錄，除咗透過網上呼籲，寫稿時都會順便宣傳。」佢話自己近年好關注全球暖化問題，希望透過參加今次活動，引起更多人關注環境問題，佢明年二月仲會去南極拍一套關於全球暖化嘅紀錄片，預計二○一二年作全球播放。