人稱「人肉錄音機」嘅政制及內地事務局局長林瑞麟（林D9）尋日出席咗個少數族裔支援中心開幕典禮，最後一班唔同種族嘅小朋友送咗缸金魚仔畀林D9，話要將希望交託喺佢手上。其實班小朋友係想林D9明白，所有族裔都好似啲金魚咁，一齊生活喺香港呢個咁細嘅金魚缸入面，雖然佢哋同其他人喺膚色上不一樣，但一樣可以為香港作出貢獻；最重要係希望林D9知道佢哋需要政府幫助先可以融入社會，送金魚仔都係想政府記得繼續撥資源支持，否則佢哋會好似無魚糧嘅金魚仔咁，好快死去。