酷熱天氣警告下，立法會議員梁劉柔芬尋日以社區導者學會召集人身份，喺鯉魚門廣場搞咗個《開你的心》攝影比賽頒獎禮，以一幅幅笑面相片送陣涼風畀街坊。精神科醫生曾繁光都加入做「笑蛋」氹人開心，仲即場模仿前港姐冠軍張嘉儀擺個「扭麻花」甫士。
咁抵得諗，皆因曾醫生做咗社區導者學會嘅義工。佢話呢十幾年人生轉變多，幾年前誤以為搵多啲錢就開心，點知亞洲金融風暴來臨，投資失利輸到債台高築，經歷慘敗後終醒覺，原來開心好簡單。「依家覺得夠使就算喇，我唔會再沉迷搏命搵錢，得閒就睇書、畫畫同做義工。」睇見曾醫生肥嘟嘟嘅樣，就知佢生活有幾寫意。
講番尋日個攝影比賽，合共收到過千份參賽作品，原來曾醫生都係攝影發燒友，廿歲開始做「龍友」，最擅長影小品題材，即係捕捉吓身邊事件喺光影之間嘅微妙一刻，近年愛上用傻瓜機，行街見乜就影乜，某次自己座駕畀人「撞屁股」損毀都影餐飽，至今家中珍藏相片多達幾萬張喎。