Ａ 亡命公共小巴；

Ｂ 着咗警號燈嘅救護車；

Ｃ 以上兩者都唔使讓。

如果答Ｂ嘅話，證明你係一個駕駛態度非常正確嘅道路使用者，不過，喺實際嘅道路環境，亡命小巴出晒名狼死兼惡死，如果唔想惹麻煩，答案都係揀Ａ好啲。

呢嗱，日前有輛載住病人嘅救護車急往醫院時，喺西區薄扶林道懷疑被一輛綠色小巴阻頭阻勢，小巴司機被指見到白車亮起藍燈，唔單止冇讓開，反而啄住白車車尾唔放，甚至將白車截停，最後導致病人遲咗七分鐘先去到醫院。

照計一個合資格嘅駕駛人士，冇理由唔知見到着咗警號燈嘅救護車或其他緊急車輛，應該慢駛或讓路㗎。呢位小巴司機唔單止唔讓路，仲涉嫌攔截緊急車輛，簡直將病人條命嚟較飛。

白車救人爭分奪秒，生死繫於一線，莫講話七分鐘吖，一分鐘都隨時搞出人命呀！香港好多救護車平時已經甩皮甩骨，冇事冇幹行行吓都會自己跪低，依家咁樣畀人截停，容乜易隨時撻唔着，咁就大件事咯！

其實呢單只係冰山一角，近年已經發生過多宗阻攔救護車延誤救人事件。試過有私家車司機爬頭迫令救護車司機停車理論，病人延誤送院達二十七分鐘，司機被控一項阻延消防人員罪名，你估判罰幾多錢？原來三千蚊咁大把咋。今次亦唔例外，警方發言人表示事件交由交通部跟進，未有採取行動。不過好多人唔係咁諗，有網友認為「留他在馬路上，根本就是一件『兇器』，隨時會有人飛來橫禍！」應該釘牌至啱。

弊在唔止執法者鬆手，司法部門量刑過輕亦一向為人詬病，莫講話阻住白車救人判得輕吖，就算係危險駕駛、醉酒駕駛殺人，都唔係判得幾重㗎咋，難怪香港嘅嚴重交通意外無日無之啦。

好似話去年西貢公路發生導致十九人死亡嘅旅遊巴嚴重車禍，肇事司機承認危險駕駛導致他人死亡罪，只係被判入獄三年零四個月，停牌三年。另外有一名的士司機撞死路旁嘅一名同行，酒精測試超標近四倍，最後亦只不過被判入獄半年，停牌兩年。試問咁嘅處罰，邊度有阻嚇作用㗎？

講到底，部分職業司機嘅駕駛態度明顯好有問題，係咪成個考牌制度太過鬆手？係咪應該好好檢討吓呢？不過，當你知道攞個教車師傅牌，只要持有相關車牌三年以上，五年內無危險駕駛撞死人同醉駕紀錄，就有資格教人，仲有乜嘢好講吖。話時話，就算亡命駕駛撞死人，出獄之後唔單止可以揸番車，仲隨時可以做埋教車師傅添，問你怕未？