楊家駿話，今次嘅颱風重創台灣，估計損失達二百億港幣；如果計埋重建費用，已經超過十年前921大地震帶來嘅損失，台灣依家好需要直升機、組合屋呢啲緊急物資。不過佢好直率咁話，香港係福地，好少遇到呢啲事情，美國嘅直升機好精密，又已經有具體回應，所以唔使麻煩特區政府派直升機幫忙啦；如果醫療方面有需要援助嘅地方，一定唔會同特區政府客氣，因為大家都係自己人嘛。

楊家駿仲好感觸話，今次風災係大自然嘅啟示，地球村仍然係多災嘅地方，面臨巨大嘅氣候變遷，我哋要好好保育土地。佢好感謝香港人嘅關心，令台灣人知道自己並不孤單，仲大讚香港人捐錢嘅速度永遠都係最快。至於張震遠亦有唔少親友喺台灣，幸好都無受風災影響，佢今次係以私人名義應邀出席活動，雖然仲未捐錢，但嚟緊幾日會行動。