教育局早前急急「補飛」，表明會喺本周內與吳斌開會，不過吳斌今次就擺出高姿態，反客為主話：「未約實（開會時間），因為政府未答我封信，亦都冇畀資料我……初稿都未敲定，我點知合唔合法？」吳斌繼續數落政府，話當局冇具體回答點搜集樣本、資料嘅處理方法同銷毀時間等問題，所以即使雙方坐低傾，作用都唔大。

吳斌仲寸爆咁話：「我唔覺得一定要諮詢我，但我坐喺度，係納稅人畀嘅錢……如果我龜縮唔出聲，係咪我失職呢？如果我同政府講一套，同市民講另一套，係咪我唔啱呢？」佢自詡以公開信形式同教育局隔空對話，係「有誠信、有透明度」嘅表現。

孫公放假副局頂上

教育局搵吳斌開會被對方請食檸檬，局長孫明揚放緊假，副局長陳維安即時見招拆招，尋日出席一個徵文比賽頒獎禮時就回應話，當局正準備文書資料，希望下星期內整理出來畀吳斌參考。佢話：「等專員睇完（資料）先傾開會時間啦！」不過，對於吳斌指教育局未有驗毒計劃嘅執行詳情，陳維安就反駁話，「當局會跟足《個人資料（私隱）條例》同專員嘅關注去做」，初步計劃喺家長同意書中，清楚列出收集樣本嘅用途、資料處理同銷毀等詳情。

吳斌同陳維安近日頻頻過招，好似吳斌上星期校準時間，趁天主教教區對驗毒計劃態度開始軟化時，突然去信教育局局長孫明揚，指計劃可能違法。正當教育局諗住約好時間同吳斌開會，大家三口六面拆掂佢，點知吳斌再次突襲，逼得陳維安急急祭出「文書資料」擋駕。吳斌出招層出不窮，唔知教育局會唔會考慮由陳維安成立「拆彈小組」迎戰呢？