依家香港啲後生仔真係愈嚟愈難教，對國家歷史知識缺乏不特止，有啲就沉迷打機，有啲仲淪落到吸毒索Ｋ，或者死慳死抵儲錢排長龍買G模攬枕，搞到學校和家長都好頭痛。資訊科技界立法會議員譚偉豪就趁呢個暑假，向囝囝進行一次國情同道德教育，帶佢去北京攀長城做好漢，仲隨身帶住本《道德經》教佢做人道理，希望佢唔好因為爸爸係一名「I.T.達人」，就有藉口終日足不出戶玩電腦。
I.T.豪經常為生意同公務京港兩邊走，不過，原來佢十四歲愛子Arthur一次都未去過京城見識，所以上月尾佢同太太就帶咗Arthur上京玩足五日，包括帶佢首次踏足萬里長城做好漢、遊覽北京頤和園同水立方，以及乘坐象徵國家現代化發展嘅京津高架鐵路，明顯係一次國情遊學團。
I.T.豪又趁大家坐車坐船冇嘢做嘅空檔，攞出一早準備好嘅《道德經》，向囝囝講解做人道理，咁樣教仔法，依家應該好少。咁究竟Arthur聽唔聽得入耳呢？I.T.豪話囝囝平日都好聽教聽話同關心社會時事，唔係因為佢有問題先搞呢個惡補課程。