本文重點
國際嬰兒、兒童用品展昨日已經圓滿結束，屬重頭戲之一嘅最靚孕媽媽選舉，今年出現一位風頭甚勁嘅新星，佢就係保安局局長李少光的新抱方燕凌。小李太背負住沉重嘅家庭包袱參選，終於不負眾望，勇奪亞軍。光哥對家事原本唔想多講，但新抱獲獎，當然開心。
去年二月拉埋天窗嘅李少光之子李霖恩（Glen）同方燕凌，為滿足恨抱孫恨到出面嘅光哥，婚後一直努力造人，結果去年如願以償，現時新抱已腹大便便，預計將於十月生產，不過臨盆在即小李太狀態不知幾好，喺BB展舉辦嘅第七屆全港最靚孕媽媽選舉，成功擊敗近二百名準媽媽打入十五強。
湊仔比併 表現大勇
方燕凌原本就係大眼美女，昨日決賽所見，佢身穿間條背心一身孕婦裝，仍不失美態，不過靚媽媽考試，內在美都好重要，經過自我介紹、飲食及健康答問環節、開奶技巧比賽等後，佢順利進入最後五強，在最後一輪湊仔大比併上表現更甚為出色，成功勇奪亞軍，更獲得「Health Baby生寶愛‧靚媽咪大獎」嘅美譽添。
卓妮好想知道老爺有幾開心，事後佢透過新聞秘書話，佢一早知道新抱參選最靚孕媽媽大賽，今次得獎，當然開心。睇嚟光哥對呢位靚新抱參賽都好支持喎。
卓妮