古人話︰少年不識愁滋味，為賦新詞強說愁。今時今日年輕人壓力爆煲，唔單止盡識愁滋味，直頭係灰爆，如果唔係，又點會三日唔埋兩日就有學生自尋短見呢？
話口未完，差啲又出事喇。一名十五歲少年尋日喺鯉魚門邨寓所企圖上吊，好彩阿媽及時發現救番。可惜吖，唔係次次都咁好彩，農曆新年復課到依家之嘛，就有六名學童尋死，最細嗰個得十二歲，近三年嚟更至少有五十二宗同類事件，認真得人驚。
花季少年人生仲喺起跑階段，未曾盛放已凋零，聽到人心都實晒。點解咁多年輕人睇唔開？家庭關係唔好，同輩唔認同甚至感情問題，都可能成為壓垮駱駝嘅最後一根稻草，但學生以學習為主，學業壓力太大無疑係最主要原因。有團體就講得啱嘞，香港地學童嘅壓力由幼稚園已經開始，一直去到中學、大學，考試成績同分數嘅競爭愈來愈劇烈。最慘係社會上流機會愈來愈少，入到大學都未必前途光明，更何況讀書不成？咁嘅環境下，家長只會更拚命催谷子女，小朋友想有個快樂童年都難。
咁點樣解決呢個問題呢？家長多啲關心仔女固然重要，學校老師亦要及早介入問題個案，但如果唔從政策層面着手，增撥資源加強專業輔導服務，改革無法令學生快樂學習嘅教育制度，做乜都係於事無補嘅啫。
不過嘥氣喇，官僚靠得住，豬乸會上樹，特別係人稱「吳得掂」嘅教育局局長吳克儉，睇櫻花（目及）制服學生妹就耍家啫，做正經嘢邊係佢嗰瓣吖。教育局早排整咗份防止學童自殺報告，表面睇招數多多，但其實好多都係口惠實不至，好似話培訓教師成為「守門人」，搵出有情緒問題學生，講就幾好聽，冇額外資源配套嗰度弊呢；至於整體教育制度問題咯喎，更只係輕輕帶過，唔怪得畀教育界狠批「做騷咁做」。
最離譜嘅係，面對學童接二連三自殺，吳得掂唔係反躬自省，鞠躬下台，反而將責任推畀小朋友，話佢哋大學揀錯科，冇做好「生涯規劃」喎。咪玩喇，好多走上絕路嘅都係中學生甚至小學生，人仔細細有咩生涯好規劃？其實講到生涯規劃失敗，吳克儉本人就係最佳人辦，明明最啱做導遊，偏偏走去做官，仲要主理「百年樹人」大計，結果咪誤人子弟囉！
點講都好喇，年輕人係香港嘅未來，自殺悲劇一宗都嫌太多，無論邊個上場做特首，點樣救救孩子都肯定係施政重中之重，其中當然唔少得好似某參選人話事偈，小心挑選適合嘅教育局局長喇！