西諺有云︰千萬唔好相信任何事情，直至官方公開否認為止。港產官僚出名有鋪隱瞞癮，每次出事例牌臭屎密冚，冚唔住就賴三賴四，真係信佢一成，雙目失明。
港珠澳大橋香港接線填海地最近被踢爆兩度外移，當時路政署官僚大派定心丸，話喺大橋兩處地點發現長約三百米及二百五十米嘅填海地，向海「伸延」五至十米，又強調對公眾安全同環境影響不大，點知話口未完就畀人踢爆擘大眼講大話，據知情人士講，填海地早喺一四年三月已出現持續外移，而且情況不斷惡化，當局一直闊佬懶理，卒之喺約半年後出現塌方，大量填海物料好似山泥傾瀉咁滑出海面，填海範圍地表嚴重扭曲變形，大片污泥升起露出水面，有如新島嶼，絕對唔止路政署官僚口中所謂「外移五至十米」咁簡單。
正所謂有圖有真相，睇番本報刊登嘅「災場」照片，滿目瘡痍十足十地震一樣，連唔少工程人員都嚇到O晒嘴。之所以搞成咁，專家估計係因為有人夾硬喺未建成嘅海堤及填海地上堆土加壓，違反「先建堤、後壓泥」工序，最終導致海堤及填海地一夜之間塌方。
咁路政署又點解畫呢？佢哋話已經聘請專家就事故提交獨立審查報告，又話冇收過承建商關於海堤伸延嘅呈報。呢啲咪典型嘅拖得就拖，賴得就賴囉，咪畀人睇死，所謂審查報告，無非又係搬一大堆專業名詞出嚟嚇唬市民，之後又係不了了之。
正如有立法會議員話齋，路政署「一個大話冚一個大話」，連環保署都呃埋，運房局除咗徹查係咪有人失職，最重要係一次過公開晒所有工程問題。冇錯喇，路政署「瞞報災情」嘅劣迹厚過本電話簿，由口岸人工島「飄移」，到擅改填海工序，再到今次堤崩土裂，次次都係傳媒揭發至死死地氣認衰，仲有幾多濕滯嘢未曝光，真係冇人話得埋。
當然喇，香港地做官永遠有權無責，唔理犯幾大錯都好，一樣好官我自為之。好似港珠澳大橋咁，貴為國家級重點基建工程，甚至被外國媒體譽為「世界新七大奇迹」之一，落入港產官僚之手即刻淪為國際級醜聞，先拖延，後趕工，甚至令人質疑有安全隱患，總其事嘅運房局局長張炳良明明要負最大責任，結果咪又係無驚無險等夠鐘收工，所謂追究責任睇怕都係得啖笑。
家陣最令人擔心嘅係，張局長臨別秋波，拍晒心口話大橋年底有條件通車，隨住「死線」愈來愈近，會唔會出現趕工犧牲質量嘅情況？萬一勉強通車，大吉利是「橋毀人亡」，到時幾多高官人頭落地都補唔番吖！