最近教育局官員好唔得閒，豬流感搞到全港停課又復課，依家又輪到煩惱校園驗毒。但吊頸都要抖吓氣，教育局副局長陳維安（Kenneth）尋日去參觀一個設計體驗營作品展，佢致辭坦言好鍾意同學一件寓意理想與現實掙扎嘅作品。Kenneth有感而發話，有時學生創作或者從事創作時，有時未必會得到認同，事關依家兩代嘅思考模式有啲唔同，佢寄語年輕人創作時唔好畀上一代或者社會嘅實際思想規範住，最緊要係「活在當下」，仲要保持住一份熱誠，因熱誠幾時都好有用喎！
Kenneth講得真切，一班同學都聽得好投入。其實過去一年來，一班副局政助日日畀人鬧，Kenneth仲因為太太喺豬流感肆虐之際、要求學校為囝囝搞小學畢業禮而備受批評；如果Kenneth唔識得「活在當下」同「保持熱誠」扮阿Ｑ，睇怕都未必捱得住！
雖然Kenneth無機會出席囝囝嘅小學畢業禮，囝囝仲為此好失望，但最近就成日參加唔同嘅畢業禮；好在Kenneth抽時間帶咗囝囝去旅行補數，等佢開心番啲！