為咗加快呢個進程，中央近年就改用速成法，大力推動啲傳統建制派同工商界第二、三代積極參政議政，希望借助佢哋父輩嘅名氣、地位同財力支援，盡快上位。其中一個培訓途徑，就係透過特區政府委任佢哋出任不同嘅法定或諮詢委員會公職，畀佢哋試吓身手，睇吓有冇進一步「升呢」發展嘅機會。

好似政府尋日同前日公布嘅兩項諮詢委員會任命，就有多達三位名人二代上榜，其中四叔李兆基大仔、百仁基金會主席李家傑就做咗粵劇發展基金顧問委員會成員；愛國商人葉樹林嘅愛子、香港青聯常務副主席葉振都，以及前全國人大常委曾憲梓嘅二仔、全國青聯副主席曾智雄，亦雙雙獲委任為博彩及獎券事務委員會成員，曾智雄仲係獲再度委任。

任命非重擔 純粹練吓劍

再翻查政府喺過去兩個月作出嘅各項任命，情況就更加明顯，其中李家傑同曾智雄早前亦獲委任做太平紳士；前港區人大代表黃保欣嘅囝囝、廠商會副會長黃友嘉，就做咗紀常會委員和土地及建設諮詢委員會成員；大興紡織創辦人陳元鉅嘅兩個兒子、工總主席陳鎮仁同新任香港青聯主席陳仲尼，亦分別做咗生產力促進局主席同數碼港董事局成員；「米業大王」唐學元嘅愛子、廣東社團總會商務委員會主任唐大威就做咗語常會委員。

如果再睇前多幾個月，菁英會主席施榮忻今年初亦獲委任為青年事務委員會成員和中央政策組非全職顧問，上屆香港青聯主席許華傑就做咗西九諮詢委員會成員，已故全國政協副主席霍英東嘅長子嫡孫霍啟剛亦做咗中策組非全職顧問。不過如果睇清楚以上任命，就會發現除咗較早出道嘅陳鎮仁之外，其他名人二代獲委任嘅公職，都算不上係重擔，純粹畀佢哋練吓劍熱吓身；佢哋最終能否更上一層樓，都要睇吓呢班名人二代係咪真係有心有力從政。