行政會議早前批准馬會加多五個本地賽馬日同十個海外賽馬日，但政府一直未有正式通知馬會，令佢哋擔心政府會好似○五年咁，因為有政黨反對而臨時縮沙；據聞馬會前日終於收到民政事務局局長嘅書面通知，放下其中一塊心頭大石，可以開展具體籌備工作。不過有馬會消息就話，增加賽馬日只係佢哋打擊非法外圍馬活動嘅其中一招，依家仲未係時候開香檳慶祝。
消息話，馬會早前向政府提議三招齊發打擊外圍馬，包括增加賽馬日、將本地賽事嘅博彩稅稅率由七成幾減至六成幾，以及將海外賽事嘅稅率減半。政府之後將個波踢咗畀由鄭慕智做主席嘅博獎會，順利通過咗第一招，但另外兩招博獎會就話唔關佢哋事，連傾都唔肯傾，將個波交番畀政府。
消息強調單靠加賽事一招，力度肯定唔足夠，所以會繼續就另外兩招同政府拗數。不過，增加賽事只須由行會通過，減博彩稅就要經立法會修例，後者嘅政治難度高好多。按照慣例，馬會主席陳祖澤要做埋明年馬季先至功成身退，睇怕阿John嚟緊仲要揸住個算盤，同政府講數！