本文重點
前工商科技局局長王永平（平叔）辭官後開始執教鞭，不時又評論吓時事，講嘢一針見血，最近仲加入埋城大教公共及社會行政學系，下學期開始就會教碩士課程。不過平叔一於挑戰自己，改變聽眾群，同小朋友講古仔，佢放下身段扮動物講嘢，估唔到一樣掂。
小朋友幫手搞氣氛
平叔係尋日書展「名人講故事」環節嘅嘉賓，唔少家長帶埋仔女一齊去捧場。但唔知係咪平時平叔講嘅嘢都係正經嘅時事評論，所以就算尋日同班小朋友講有關十二生肖嘅《中國動物故事》，一開始都好似提唔起小朋友嘅興趣。平叔放低做老師嘅包袱，不時扮吓動物講嘢，又拉埋小朋友一齊幫手去講古仔，終於都帶起番個氣氛。
呢位故事叔叔有時都要考考小朋友，佢不時問吓小朋友一啲動物嘅英文串法，好彩班小朋友個個都識答，氹得平叔好開心。最後影大合照嘅時候，平叔已經同班小朋友打成一片，竟然有人叫佢做o靚仔，仲有個小朋友同平叔爭大會畀佢嘅紀念品添。
其實平叔一早就做好功課，諗住小朋友鍾意動物先講呢個十二生肖嘅古仔。平叔對班小朋友嘅反應好滿意，話仲好過一啲大學生喎！
卓妮