【本報綜合報道】上季一級方程式總冠軍英國嘅咸美頓，終於打開今季勝利之門，為自己及麥拿侖車隊取得開門紅。咸美頓於匈牙利站藉住排頭位兼一路帶頭嘅法國雷諾車手阿倫素「甩轆」，一舉殺上率先衝過終點，贏得今季首個分站冠軍之餘，亦打破布朗及紅牛過去九個分站嘅壟斷局面。

排第四起步嘅咸美頓，一開跑已經發揮「黑帝」本色，與第二、三位嘅兩名紅牛車手維度爾及韋伯爭位，入彎時殺上第二，但出彎後又被韋伯反先，但咸美頓一直等待機會，到第四圈已經越過韋伯上到第二位。

雷諾機械師嚴重犯錯

雖然帶頭位嘅阿倫素領先咸美頓三秒，但「黑帝」每個圈都縮短距離，直至第十一個圈，阿倫素進入維修站，停車時間用咗六點四秒，不過機械師似乎操之過急，未有裝好右前轆，阿倫素出跑道後半個圈突然「甩轆」，佢揸住架「三輪車」再入維修站，但已經落後咸美頓一個圈，最終阿倫素跑到第十六個圈，更因機件故障退出。

咸美頓跟住就喺毫無對手威脅嘅情況下，直帶返終點，今季終於一嘗冠軍滋味，為自己及麥拿侖車隊一吐烏氣，亞軍嘅係芬蘭「冰人」拉哥倫，而季軍則係韋伯。