病態官僚係點樣倒錢落海嘅呢？就咁，康文署見到香港好多泳灘出現海沙流失現象，於是出錢買沙，然後出力鋪沙，企圖愚公移沙，埋單計數大拿拿用咗一千六百六十萬公帑。點不知，一個颱風掃過去，呵呵，風吹雞蛋殼，財散人安樂，一夜之間大量海沙捲晒入海。

話時話，前排搞到香港要掛九號波嘅颱風莫拉菲確係威力驚人，以高達每小時一百四十公里嘅風力橫掃全城，部分沙灘嘅海沙足足低咗三呎。知唔知邊度係重災區？答案係屯門青山公路嘅黃金泳灘。

黃金泳灘本來係石灘，後來改成人造沙灘。可能因為先天不足，加上後天失調，黃金泳灘經常都會出現海沙流失現象。為咗力挽狂「沙」於既倒，康文署決定今年四月八日開始，將沙灘近半面積封閉，展開重鋪海沙工作。另外，黃金泳灘今個月開始裝置兩條臨時護沙堤，希望阻止海沙沖走。

講到呢度，功夫茶想同大家研究一下基本地理常識。沙灘係點樣形成嘅呢？沙粒又係來自何方嘅呢？簡單咁講，沙灘通常係一個灣，而灣之為灣，顧名思義形狀係彎嘅，咁先至可以積聚沙粒吖嘛。至於沙粒來自何方咯喎，大部分係粉碎咗嘅珊瑚同埋貝殼。亦即係話，如果沙灘唔夠彎，海沙係好易沖走嘅，而如果附近海域又冇珊瑚同埋貝殼，沙粒係好難補充嘅。

講番黃金泳灘嘞，大家打開地圖睇一睇，海岸線又長又直，呢個就係先天不足，所以佢本來係石灘，而唔係沙灘。咁乜嘢係後天失調呀？既然叫得做人造沙灘，梗係以人工方法補救㗎啦，好衰唔衰，康文署唔知係戇居居定係懶懶閒，所謂護沙堤，居然係垂直設計，根本冇辦法阻擋海沙流失！

你估康文署見到大量海沙流失有乜嘢反應吖嗱？佢哋扮晒叉燒咁話喎，根據土木工程拓展署檢視，認為海沙移動情況係預期之內。

其實功夫茶都有資格做大官㗎，因為功夫茶都識得講，海沙移動情況當然係預期之內啦，設計太笨吖嘛。咁都唔止喎，如果康文署仲唔諗辦法改善護沙堤，海沙移動情況不斷惡化都係預期之內，無論重鋪幾多沙，照樣沖走幾多沙！

計功夫茶話齋，保護沙灘係唔可以淨係靠愚公移沙嘅，應該有一套全盤方案。講過啦，沙粒來自珊瑚同埋貝殼吖嘛，如果唔去好好保護香港海洋生態，珊瑚唔見晒，貝殼又冇埋，倒幾多錢落海都係冇用嘅，由始至終擔沙塞海。

唉，一場颱風搞到香港泳灘飛沙走石，尖石外露隨時傷人，你話康文署係咪病態官僚吖？最病態嗰個係署長周達明，轄下工作做到一鑊泡，居然戴罪升官喎，轉做發展局常任秘書長喎，吹乒乓！