真係撞鬼你咯！點見效啊？張建宗先前至話：全港四十八萬幾攞綜援嘅人，有公屋住嘅得三十三萬多啲。剩番嗰十五萬，唔使問阿宗，必然係住在環境惡劣的天台屋、板間房、鐵皮屋、木屋。當啲高官在叫「啲冷氣凍死人」時，呢十五萬人在三十七度的屋內「焗桑拿」，上月葵涌一間木屋嘅男戶主，便懷疑為咗慳電，連風扇都唔捨得開，瞓瞓吓覺熱死咗。請問紓困措施如何見效？鬍鬚曾最衰唔肯放低把劍下山，把那些「三無人士」、「五苦市民」找出來。

百歲國學家文懷沙在鄭州所作「國學與現代商業的撞擊」講座中說：如果孔子、老子和釋迦牟尼碰到了金融風暴，他們肯定不會尋短見。為甚麼？因為他們有一種情懷。地球上最大的空間是海洋，比海洋更大的空間是天空，比天空更大的是思想家的情懷。

張建宗無疑深具「思想家的情懷」，高官上班睇鹹網可以秘密調職，而在職貧窮、年輕人失業、大學生畢業即使唔係失業，都淪為廉價見習生……這種種社會問題，一句「失業率升幅放緩」就可輕輕帶過？我等蟻民若堅持「思想家的情懷」，最壞的打算就是上廁所時候留一半，免得餓得太快。