本文重點
一年一度嘅書展尋日開幕，灣仔一帶朝早就開始人頭湧湧。曾蔭權尋日朝早都急急腳去書展攞彩，成個皇帝出巡咁款，佢身邊嘅跟班再加上採訪嘅傳媒，加埋幾十人，巡場時搞到推冧啲書，附近書商又冇生意做，做騷變倒米。
煲呔曾尋日先為會展擴建部分主持啟用儀式，之後就去書展巡視，佢先喺專售賣英文書籍嘅書攤稍作停留，再去賣香港及內地書籍的書攤巡視。煲呔曾仲買咗兩本同保育有關嘅書，一本係海洋公園熊貓基金負責人陳晴寫佢收養熊貓嘅《兩晴相悅》，另一本係劉斯傑講香港建築風格嘅《香港彈起》。
巡場半個鐘擾民
不過煲呔曾一行人去到邊塞到邊，好似喺其中一個書攤行過嗰陣仲推冧一大疊書，大大話話有十幾本，點知煲呔曾見到後連手指尾都冇郁過，執書嘅工作，留番畀工作人員做。佢喺會場停留咗半個鐘，有市民以為明星駕到，但看清楚是煲呔曾巡場時，忍唔住大「唓」一聲，埋怨佢好擾民！