早幾日中午卓妮路經香港會，撞見孫公同新任語常會主席程介明齊齊撐完枱腳行出嚟。孫公話近日愈忙愈肥，床邊已添置一部跑步機，打算趁暑假日日跑步瘦身，目標係減十磅。孫公暑期冇乜着落，孫太當然最有話事權。

卓妮打畀孫太同佢傾偈，佢透露最恨飛去加拿大，一來可以探望居於溫哥華嘅孫公阿叔，順便飛埋去多倫多探吓自己啲細佬妹，樂享天倫真happy。

短途迪士尼照殺

不過孫太擔心飛加國路途遠咗啲，又比較頻撲，驚孫公唔鍾意，所以佢已做好兩手準備，一係推介孫公去日本或者韓國瘋狂掃貨及食嘢，呢個屬於中途計劃；或者退而求其次，短短哋去香港迪士尼都好過冇喎。

孫太連迪士尼都殺，無計喇，原來佢一直未去過香港迪士尼，個心好恨去玩番轉。卓妮就認為，既然孫太花咁多心思氹老公開心，睇怕孫公應該識做，唔好悶喺屋企冷落嬌妻囉。

卓妮轉頭同程介明講起豬流感有否打亂學生哥嘅學習進度。程Sir話，查實幾年前發生沙士期間，教育界已諗緊發展一套校外授課系統，等學生哥毋須返學，一樣可以上堂聽書。不過沙士話咁快就過，呢個構思不了了之，依家豬流感疫情未見消退，程Sir話，相信學界好快會重新研究校外授課嘅可行性喎。

卓妮