立法會社福界代表張國柱係論壇嘅主講嘉賓之一，佢話嚟得就預咗有危險，所以佢已經一早諗定如果真係咁唔好彩「中彈」，就即時瞇埋對眼，因為手手腳腳整親，可能沖沖水就冇乜事，相對而言，靈魂之窗咁脆弱，鏹水入眼真係唔講得笑。

由於尋日係星期日，論壇舉行期間吸引咗唔少市民圍觀，最多人嘅時候差唔多有成百人。論壇搞手、立法會議員馮檢基話申請使用該場地時，啱啱發生第二單鏹水彈「炸人」事件，不過因為呢個論壇係七一連串活動之一，加上佢個人好阿Ｑ咁認為活動「夠正氣」，相信狂徒唔會亂嚟，所以決定如期舉行論壇。不過，民協主席廖成利就唔似阿基大安旨意，佢尋日發言時專登對住個天講：「呢度有天眼，唔好掟我呀！」場面搞笑。