范太最近呢幾個月愛上藍芽耳機，事關佢成日要揸車，以前用免提裝置講電話，佢嫌條電線繞嚟繞去好麻煩，藍芽耳機就無呢個煩惱，又唔使吓吓喺手袋裏面搵電話，方便得多咁話。卓妮撞到范太嗰日，佢就戴住藍芽耳機周街走，話戴得舒服，停車都唔使除喎。事實上，范太戴咗藍芽耳機，人都變得「高科技」啲，多咗份年輕氣息。

不過，據范太講，買藍芽耳機，佢都經過一輪心理掙扎㗎：「部機要成六百蚊，好多錢」，佢諗咗好耐，度過真係有咁嘅需要，先至狠下決心扑錘買返屋企，好彩用落覺得筆錢一啲都冇嘥。

為馬改名傷腦筋

范太為六百蚊煩惱，大家未必信，不過識得佢耐嘅人就知一啲都唔奇，因為范太一向儉樸，當然，范太亦係應使則使，最近佢同兒子范駿華抽中籤，嚟緊可以養新馬，范太再續父輩結下嘅愛馬之緣，如果揀到良駒，會喺下年九月運抵香港，范太講笑話，幫匹新馬改名都幾傷腦筋。之前佢同已故嘅丈夫范尚德養過「別具一格」同「另具一格」，估唔到喺匹馬嚟到之前嘅一年幾，成個腦已經一格一格！

卓妮