范太任大董後首次中籤

卓妮細心睇，中籤名單有成三百幾個名，當中組合各有特色，母子檔就有做咗馬會大董後首次入籤抽馬嘅范太及其公子范駿華，夫妻檔嘅代表人物有嫁入豪門嘅女星李嘉欣首度榮升馬主，佢拍住老公亨亨抽馬，終於如願以償。咁啱得咁橋，佢老爺許世勳及奶奶都聯名中籤，但嘉欣並冇好似奶奶咁以「許夫人」自居，而係用番「李嘉欣女士」，唔通大美人覺得呢個稱呼後生啲？

許仕仁（左一）中籤買新馬。 （資料圖片）	李嘉欣（左）同老公許晉亨入籤抽馬「中咗獎」，如願榮升馬主。 （資料圖片）	范駿華（左）間唔中都有入馬場，陪母親睇跑馬。 （資料圖片）

嘉欣經理人陳善之都唔知箇中原因，話呢啲係嘉欣嘅私人嘢喎。馬會公關就話，佢哋冇規定已婚女士一定要寫「乜乜夫人」，申請人入籤時點寫就根據當事人意願。

羅傑承七位數尋千里馬

中籤嘅夫妻檔仲有南華足主羅傑承及太太梁芷珊。羅生話，之前同太太已聯名養咗匹馬，自己亦有兩匹團體馬。佢近年專攻打吡香港大賽，可惜兩次派愛駒上陣都只得第五及第六名，三甲不入；今次再抽中馬，佢打算以七位數字物色一匹千里馬，再戰打吡賽。

有資格養多隻馬嘅仲有許仕仁及政務司司長唐英年，兩人之前夾份養匹「大師」，今次再孖住上抽中馬，未知會否為兩人帶來好運？除此之外，港交所主席夏佳理、陳振聰御用風水大狀陳景生、馬會主席陳祖澤、信置主席黃志祥公子黃永光、行會成員劉皇發以及公子劉業強、莎莎老闆郭少明及太太羅桂珍、全國政協黃英豪、全國政協常委洪祖杭以及理文造紙太子爺李文斌都喺中籤名單之列。

卓妮